DED akutana na viongozi sekta ya Elimu Mkuranga

Posted on: January 15th, 2023

Mkurugenzi Mtendaji wa Halmashauri ya Wilaya ya Mkuranga Mkoa wa Pwani Mwantum Mgonja amefanya kikao kazi na kutekeleza maelekezo ya Waziri wa Nchi Ofisi ya Rais Tamisemi Angela Kairuki (MB) aliyoyatoa tarehe 10/01/2023 akiwa ziarani Mkoani Pwani yanayohusu Sekta ya Elimu Nchini.

Mkurugenzi amefanya kikao kazi hicho pamoja na wakuu wa Idara ya Elimu Sekondari na msingi, Maafisa Elimu Kata na Walimu wakuu wote wa shule za msingi. Wengine ni wakuu wa shule za Sekondari pamoja na walimu wote wa shule za msingi na sekondari.

katika kikao hiko alisisitiza viongozi wote wa elimu na walimu kuwajibika kazini, kujenga mahusiano mazuri mahala pa kazi pamoja na kuwa na mahusiano na viongozi wa chama na serikali bila ya kusahau wananchi.

Hata hivyo amewataka walimu kufanya kazi kwa bidii na kupandisha ufaulu kwa 100% kwa madaraja ya A na B sambamba na kuwa wanyenyekevu na kufanya kazi kwa matokeo kwa dhamira ya kuleta matokeo makubwa.

Aidha viongozi wa Elimu walisisitizwa kupitia na kusoma Mikataba ya kazi iliyotolewa na OR – TAMISEMI na kuielewa sambamba na kuisaini kwa ajili ya utekelezaji wa majukumu yao ya kila siku ili kuleta matokeo chanya katika Sekta ya Elimu.

Aidha Mkurugenzi alipata fursa ya kuwapongeza na kuwapa motisha Walimu wote waliofika shuleni kwa ajili ya kuwafundisha wananfunzi wa darasa la saba na la nne katika siku ya sherehe za Mapinduzi kwa lengo la kuwaimarisha na kuwawezesha kufanya vizuri katika Masomo yao.