IDARA YA ELIMU SEKONDARI WILAYA YA MKURANGA YAJIPANGA MAANDALIZI MTIHANI WA KIDATO CHA SITA

Posted on: May 25th, 2020

Mkuu wa idara ya Elimu sekondari Halmashauri ya Wilaya ya Mkuranga  Mkoa wa Pwani Mwl. Benjamin Majoya leo amezungumza na Afisa Habari Wilaya  kuhusiana na maandalizi ya mapokezi ya wanafunzi wa kidato cha sita ambao wanatarajiwa kuripoti shuleni kuanzia tarehe 1/6/2020

Mwalimu Majoya alisema wao kama idara kwa ushirikiano wa walimu wa shule zote zenye kidato cha sita ambazo ni shule ya sekondari Mwinyi, Nasibugani na St Mathew walijipanga mapema kwa kuwasaidia wanafunzi  na  kuwaandalia masomo na kuwatumia kwa njia ya mtandao ili waweze kujisomea wakati walipokua wanasubiri tamko la Serikali.

Sambamba na hilo Mkuu wa Idara ya Elimu Sekondari alisema  “hawa watoto walishasoma na tayari walikua wameshajiandaa kwa ajili ya mitihani yao ya mwisho kilichotokea baada ya tamko la kufungwa kwa shule kiliwahuzunisha na kuwapunguza morali lakini anaamini wanafunzi  wa kidato cha sita ni watoto wenye uelewa ukilinganisha na wale waliopo madarasa ya chini…

Akizungumzia  changamoto ya ugonjwa wa homa kali ya mapafu inayosababishwa na kirusi cha corona alisema wao kama walimu wamejipanga kusambaza ndoo za maji na sabuni katika shule zote na kuwasisitiza wazazi wanapowarejesha watoto mashuleni mapema mwishoni mwa wiki hii wasisahau kuwapa barakoa nyingi kadri ya matumizi  ili waweze kujilinda wakiwa maeneo ya Shule

Kwa kuhitimisha bwana Benjamini alisisitiza atashirikiana na Idara ya Afya ya Hamashauri ya Wilaya kwa kuwaomba waende kutoa elimu zaidi mashuleni kwa kipindi ambacho watoto hao watakapokua wanasubiri kufanya mtihani wa kumaliza kidato cha sita ila kuwaongezea elimu zaidi kuhusiana na mapambano ya kirusi cha Corona

Mitihani ya kidato cha sita inatarajiwa kuanza mwishoni mwa mwezi wa sita mwaka huu kama tamko la serikali lilivyosisitiza chini ya Wizara ya Elimu.