Mkuranga wamwagiwa vifaa vya michezo

Posted on: February 13th, 2018

Kituo cha Michezo cha Atletico de Vibula kilichopo katika kijiji cha Kisemvule kata ya Vikindu wilayani Mkuranga Jana kimepatiwa vifaa mbalimbali vya michezo vikiwemo jezi na mipira ili kuboresha na kuendeleza vipaji vya michezo vya vijana wadogo wanaokuzwa na kituo.

Akikabidhi vifaa hivyo ndg. Raymond Huang kwa niaba ya kampuni ya WU ZHOU INVESTMENT LTD. Inayojishughulisha na uundaji wa pikipiki za SanLG aliahidi kuendelea kusaidia vifaa zaidi vya michezo katika kituo hiki huku akitoa rai kwa kituo kutumia vizuri vifaa vinavyotolewa ili vilete tija na manufaa kwa walengwa; "Leo kampuni yetu inatoa vifaa vya michezo kwa kituo hiki ili kusaidia maendeleo ya michezo kwa vijana, ni vizuri vifaa hivi vichache vikatumika vizuri na kwamba kampuni yetu itaendelea kusaidia katika shughuli za michezo za watoto hawa".Alisema bwana Raymond.

Afisa Michezo wa wilaya Bwana Pembe Mlekwa aliishukuru kampuni ya WU ZHOU kwa kuona umuhimu wa kusaidia mikakati ya kuibua na kuendeleza vipaji vya michezo kwa watoto ili kuweza kujenga misingi bora ya maendeleo ya michezo katika ngazi zote.