Mkuranga wanunua gari la wagonjwa

Posted on: May 19th, 2017

Mwenyekiti wa Halmashauri ya Wilaya ya Mkuranga Mh Juma Abeid amemkabidhi  gari la wagonjwa  Mkurugenzi Mtendaji wa Halmashauri ya Mkuranga leo wakati wa hafla fupi ya makabidhiano hayo yaliyofanyika kwenye hospitali ya wilaya ya Mkuranga.

Akitoa ufafanuzi Mh Juma Abeid alisema kwamba tangu hospitali ya wilaya kuanzishwa Halmashauri haijawahi kununua gari la wagonjwa kutokana na mapato ya Halmashauri lakini kwa sasa mapato yaliyopatikana yamesaidia kununua gari la wagonjwa ambapo imegharimu mil 137.

Mh juma Abeid aliongeza kuwa “Tumeanza na gari la wagonjwa na baadae tunatarajia  tununue X-Ray kwani tumeomba muda mrefu kununuliwa lakini mpaka leo bado hatujapata kwakua uwezo wa kukusanya tunao tutatumia mapato yetu ya ndani ili kupunguza kero mbalimbali kwa wananchi wetu”

Mweyekiti wa kamati ya  Uchumi, Ujenzi na Mazingira Mh Nicholaus Kampa alisema kwamba kumekuwa na shida sana ya gari la wagonjwa Mkuranga lakini baada ya kufanya vikao vya maamuzi tukaona ni vema mapato yetu yakatumika kununua gari la wagonjwa kwani tupo hapa kwa ajili ya kuwasaidia  wananchi wetu.

Mkurugenzi Mtendaji wa Halmashauri ya Wilaya ya Mkuranga Mhandisi Mshamu Munde baada ya kukabidhiwa gari la wagonjwa na Mwenyekiti wa Halmashauri alisema atahakikisha gari la wagonjwa linatumika ipasavyo na kutunzwa vizuri ili liwasaidie wananchi wetu.

Sikudhani Juma ambaye alikuwa shuhuda wakati wa makabidhiano ya gari la wagonjwa alisema anashukuru Halmashauri na viongozi wake  kwa jitihada iliyofanya kupata gari la wagonjwa kwani litasaidia kupunguza vifo visivyo vya lazima hasa kwa wakina mama na watoto.