MAUNDU AUKWAA UMAKAMU MWENYEKITI

Posted on: August 16th, 2024

Aliyekuwa Makamu Mwenyekiti wa Halmashauri ya Wilaya ya Mkuranga, Mohamedi Maundu ambaye ni Diwani wa Kata ya Vikindu amechaguliwa tena kuendelea na nafasi hiyo kwa kupigiwa kura zote 25 za ndiyo.

Mh. Maundu amechaguliwa kwa kupigiwa kura ya ndiyo baada ya kuwa mgombea pekee ambaye jina lake liliwasilishwa  katika Mkutano huo kupitia Chama cha Mapinduzi Wilaya ya Mkuranga.

Baada ya kufanyika kwa uchaguzi huo baraza limethibitisha wenyeviti wa Kamati za kudumu ambazo ni Kamati ya huduma za kijamii, Kamati ya huduma za kiuchumi na Kamati ya maadili baada ya wajumbe wa kamati hizo kuwachagua viongozi hao.

Kamati ya huduma za kijamii itaongozwa na Ally Dau baada ya kupata kura zote za wajumbe 13, Kamati ya huduma za kiuchumi itaongozwa na Hassan Dunda baada ya kupata kura zote 12 na Kamati ya maadili itaongozwa na Rashid Matume baada ya kupata kura zote 5.

Akitoa shukrani, Mh. Maundu amesema anawashukuru Wajumbe wa Baraza hilo kwa kumuamini na kumpa nafasi hiyo kwa mara nyingine, na ameahidi kuendelea kuwapa ushirikiano ili kufanikisha mipango na kufikia malengo ya Halmashauri.