MIFUKO 1000 YA SARUJI YAWA CHACHU KATIKA KUKWAMUA MIRADI ILIYOKWAMA MKURANGA

Posted on: June 8th, 2020

Mkuu wa Wilaya ya Mkuranga Mkoa wa Pwani  Mhe. Filberto Sanga leo  amepokea mifuko ya Saruji 1000, kutoka katika kiwanda cha (FORTUNE CEMENT (T) LIMITED) kilichopo katika Wilaya ya Mkuranga ikiwa ni sehemu ya ushiriki wake katika utoaji wa huduma za kijamii kwa wawekezaji wote waliopo Wilaya hii.

Akizungumza katika makabidhiano hayo Mhe. Sanga aliwashukuru sana wamiliki wa kiwanda hicho  na kusema amepokea kwa furaha kubwa msaada huo na utaenda kutekeleza miradi mbali mbali ya maendeleo katika sekta za Afya, Elimu,Utawala, Idara ya Ulinzi na Usalama, pamoja na Taasisi za Kidini  ikiwa ni sehemu ya kuunga mkono juhudi za maendeleo katika Wilaya yetu ya Mkuranga..

Aidha, Mkurugenzi Mtendaji wa Halmashauri ya Wilaya ya Mkuranga,  Mhandisi Msham Munde amempongeza Mkuu wa Wilaya na ofisi yake kwa kuhusika moja kwa moja katika kufanikisha upatikanaji wa saruji hiyo, “miradi iliyokwama itaenda kutekelezwa kutokana na upatikanaji wa saruji hiyo, lakini pia mifuko wanayopewa kwa ajili ya ujenzi wa taasisi zilizopo chini yake itatumika kutekeleza miradi yote iliyoainishwa bila kupindisha matumizi” alisema

Naye mchungaji wa kanisa la Anglican Martin Kihula akitoa shukrani zake  alisema saruji hii waliyopokea itatumika kujenga nyumba ya mtumishi wa kanisa hilo na kuendeleza ujenzi wa kanisa, ameishukuru pia ofisi ya mkuu wa wilaya katika kukumbuka mchango wa taasisi za dini katika kuleta ustawi wa jamii ndani ya wilaya na kuendeleza ushirikiano ambao wamekuwa wakiupata kutoka Ofisi ya Mkuu wa wilaya kwani imekua kama ni kawaida kukumbukwa katika misaada mingi inayotolewa na wadau.

Sambamba na hilo muwakilishi kutoka katika taasisi ya dini ya kiisilam Ndg. Hemedi Masendela kwa niaba ya Shekhe Mkuu wa Wilaya ameshukuru kwa kupokea mifuko 50 ya ujenzi wa msikiti. Aidha, ameomba msaada huo usiishie hapo kwa kuwa wana mambo mengi katika taasisi hiyo hivyo ameomba kupatiwa ushirikiano zaidi kadri hali itakavyoruhusu ili kuweza kutatua baadhi ya changamoto zinazoikabili taasisi hiyo ili kuweza kusonga mbele katika utoaji wa huduma za kidini.