MKURANGA WATAKIWA KUFURIKA KIPALA MPAKANI KUUKARIBISHA MWENGE WA UHURU JUMATANO

Posted on: July 20th, 2019

Madiwani wanaounda Halmashauri  ya Wilaya ya Mkuranga  Mkoa wa Pwani wameombwa kuwaagiza Wenyeviti wa vitongoji  na vijiji sambamba  na watendaji  wao ili wahamasishe wananchi wafurike kwenye kijiji  cha kipala  mpakani  kuupokea  mwenge wa uhuru kimkoa jumatano.

Akizungumza ofisini kwake jana Mkuu wa Wilaya Filberto Sanga alisema  zitakuwepo  Burudani mbali mbali kwa ajili ya Mkesha ili kuamkia mapokezi ya Mwenge toka Mkoa wa Dar es salaam .

Aidha Sanga aliwageukia Madiwani Wenyeviti ,Watendaji sambamba na Walimu ambao kuna miradi ya Mwenge  wahakikishe wananchi wanakuwepo kwa wingi  kwenye matukio huku wakijipanga kwenye suala zima la ulinzi na usalama.

Kwa upande wake Mkurugenzi  wa Halmashauri ya Wilaya  Mhandisi Mshamu Munde  alitumia  fursa hiyo kuwataka watendaji  wataalamu  na Wakuu Wa Idara  kuhakikisha wanakuwepo kwenye matukio na hususani salam za utii kwa Raisi Dk. John Pombe Magufuli,  na mkesha kuelekea  kukabidhi kwa kishindo Mwenge Wilaya ya Kibiti kijiji cha Jaribu Mpakani.

Naye mdau maarufu Ahmed Salim wa kijiji cha Kisemvule  aliwataka wananchi  wenzake waupe umuhimu Mwenge wa Uhuru ulioasisiwa na BABA WA TAIFA hayati Julius Nyerere  huku akiwaomba  wananchi  wa kata ya Vikindu kuwahi mapema asubuhi ya Jumatano na Alhamisi ili kuupokea na kusindikiza  kwenye wilaya YA KIBITI .