DC Sanga atoa maagizo kwa Wananchi, Halmashauri

Posted on: January 16th, 2018

Kikao cha baraza la Ushauri la Wilaya ya Mkuranga kilifanyika jana tarehe 15.01.2018 katika ukumbi wa mikutano wa Felix Garden Mkuranga mjini kujadili mipango pamoja na shughuli mbalimbali za maendeleo zinazofanyika hapa wilayani. Akizungumza katika kikao hicho, mwenyekiti wa baraza hilo ambaye pia ni mkuu wa wilaya ya Mkuranga Mhe. Filberto Sanga alitoa shukrani za dhati kwa wananchi wote wa Mkuranga kwa ushirikiano mkubwa walioutoa kwa vyombo mbalimbali vya usalama wa raia na hivyo kufanikisha kudhibiti vitendo vya uhalifu vilivyokuwa vinaashiria kutoweka kwa amani katika wilaya. “Hivi sasa wilaya yetu ni salama na wananchi wote wanaendelea vizuri na shughuli zao za kiuchumi” Alisema!.

Aidha pamoja na hali hiyo ya utulivu, alisisitiza kuwa zuio la PikiPiki (Bodaboda) kutotembea baada ya saa 12:00 Jioni linaendelea kama ilivyoazimiwa na kamati ya ulinzi na usalama ya mkoa. Aliwataka wananchi wote kuendelea kuchukua tahadhari kwa kuwafuatilia wageni wote wanaoingia katika maeneo yao kwa kutambua wanapotoka na shughuli wanazozifanya. Pamoja na nasaha zake kwa wajumbe waliohudhuria kikao hicho, Mhe. Mkuu wa wilaya alitoa matangazo yafuatayo:-

• Sherehe zote za kitaifa ziandaliwe na kuadhimishwa kwa kuzingatia ratiba ya matukio ya kitaifa, hiyo ni sambamba na Siku ya usafi kila jumamosi ya kwanza ya mwezi na Mazoezi kwa Afya kila jumamosi ya pili.
• Zipo kesi mbalimbali za Ardhi na migogoro mingi ya ardhi katika wilaya hivyo kuanzia sasa Mauzo yoyote ya ardhi yasimamiwe na Mwenyekiti wa kijiji husika na kuidhinishwa na wajumbe wa serikali ya kijiji.
• Mkuranga inawakaribisha wawekezaji mbalimbali kuja kuwekeza katika maeneo ambayo yametengwa kwa ajili ya uwekezaji, hivyo kuanzia sasa uwepo uwazi kuhusu wawekezaji wanaofika na kufanya uwekezaji katika wilaya yetu.
• Zipo taasisi mbalimbali za kidini na mashirika yasiyo ya kiserikali (NGO’S) zinazofanya kazi mbalimbali na hata kutekeleza miradi mbalimbali ya kijamii. Amewataka viongozi wa ngazi zote kutoa ushirikiano na kutokuwa kikwazo kwa maendeleo.
• Mwisho alitangaza ratiba ya ziara katika vijiji mbalimbali kusikiliza kero za wananchi, aliwataka viongozi wote na wataalamu katika maeneo husika kutoa ushirikiano.