Naibu Waziri wa Mifugo na Uvuvi aagiza kutengwa maeneo ya wafugaji

Posted on: October 11th, 2017

Naibu Waziri wa Mifugo na Uvuvi Mh.Abdallah Hamisi Ulega (Mb) ameiagiza Halmashauri ya Wilaya ya Mkuranga kushirikiana na wananchi kutenga maeneo kwa ajili ya wafugaji ili kupunguza migogoro ya wakulima na wafugaji.

Akizungumza na kamati ya ulinzi na usalama ya Wilaya, viongozi  wa Chama cha Mapinduzi Wilaya  na Watendaji wa Halmashari ya Wilaya ya Mkuranga Mkoani Pwani alisema tatizo la wakulima na wafugaji ni changamoto kubwa, hivyo ni muhimu kutenga maeneo kwa ajili ya wafugaji ili mifugo yao isizagae hovyo.

“Tunahitaji tutenge,tupime na kumilikisha ardhi kwa ajili ya wafugaji, hii ni changamoto tunayotakiwa kuifanyia kazi haraka iwezekanavyo ili kudhibiti mifugo isizagae hovyo” alisema.

Aidha alisema kuwa Halmashauri inatakiwa kukagua, kupima ardhi, na kutengeneza miundo mbinu bora kwa ajili ya wafugaji na kuwapeleka huko. Alisema, kwa kufanya hivyo itarahisisha kuwatambua wavamizi na wasio fuata sheria  na kuweza kuwashughulikia  ipasavyo kwa mujibu wa Sheria.

Kwa upande wake Mkuu wa Wilaya ya Mkuranga Mh Filberto Sanga alisema kuwa changamoto kubwa inayowakabili wananchi wa Mkuranga ni uuzaji wa ardhi, wananchi wanauza ardhi kiholela kiasi  kwamba wanakosa maeneo ya kilimo hivyo amewataka wananchi kutouza ardhi hovyo.

Sanga alisema kuwa agizo la Naibu waziri wamelipokea ijapokuwa wana uhaba  wa ardhi lakini wameainisha baadhi ya maeneo yaliyopo tarafa ya Mkamba ambayo watayafanyia ukaguzi kwa ajili ya wafugaji.