Neelkanth yakabidhi viti 100 Shule ya Sekondari Shungubweni

Posted on: January 27th, 2020

Kampuni ya Neelkanth salt iliyopo Wilaya ya Mkuranga Mkoa wa Pwani imekabidhi viti 100 vya plastiki katika shule ya sekondari Shungubweni kwa lengo la kupunguza uhaba wa viti katika shule hiyo ambayo ni changamoto kubwa kulinganisha na idadi kubwa ya wanafunzi waliopo hapo.

Akikabidhi viti hivyo pamoja na pakiti za chumvi mwanzoni mwa wiki, Mkuu wa uendeshaji na mdhibiti wa mifumo Himit Gandhi amesema wao kama wawekezaji katika Kata hiyo wako tayari kuisaidia  na kuendeleza mahusiano mema katika kuchangia maendeleo katika shule hiyo.

Gandhi amekabidhi msaada huo wenye thamani ya shilingi milioni 1.5 na kuwataka wanafunzi wa shule hiyo kuongeza bidii katika masomo na kuwahakikishia kuwa atakuwa anafuatilia matokeo katika shule hiyo na wakiwa wanafanya vizuri ataendelea kuisaidia shule hiyo.

Awali Afisa Ulinzi na Mazingira Nassoro Kilapo amesema kampuni hiyo imekuwa ikifanya shughuli za kimaendeleo katika Kata hiyo katika sekta mbalimbali kama vile Miundo mbinu ya Barabara, Elimu na nyinginezo hivyo amewataka wananchi wa Kata hiyo na vijiji vinavyoizunguka shule hiyo kutoa ushirikiano mzuri na kampuni hiyo sambamba na kuwataka wanafunzi wa kike kutojihusisha na mahusiano na badala yake kuzingatia masomo.

Nae Afisa Rasilimali watu wa kampuni hiyo Saidi Kubenea amewataka wanafunzi hao kujikita katika elimu kwani ndiyo urithi mzuri katika maisha yao na wala siyo kurithi majumba na magari na kusisitiza kuwa ukiwa na elimu hakuna mtu atakayeweza kukunyang’anya.

Akitoa neno la shukrani Mwenyekiti wa Kijiji cha Msolwa kwa niaba ya Kata ya Shungubweni Muharami Pangala, ameiomba kampuni hiyo isiwachoke katika kuwasaidia wananchi na kuwaomba wakijaaliwa basi waisaidie shule hiyo kujenga bweni kwa ajili ya wasichana kwani imekuwa ni kero kubwa sana kwa kuwa wanafunzi wengi wa kike wanatoka umbali mrefu kufuuata shule hiyo.