TAMISEMI YAWAAGIZA WAKURUGENZI KUSIMAMIA MIRADI YA TASAF..

Posted on: September 17th, 2019

Naibu Katibu Mkuu Ofisi ya Rais Tamisemi DR. Dorothy  Gwajima  amewaagiza Wakurugenzi wa Halmashauri kote Nchini kusimamia miradi ya TASAF kikamilifu na kuhakikisha katika vikao vyao vya  Halmashauri vya kila mwezi kunakuwa na agenda ya TASAF.

DR.Dorothy ameyasema hayo katika mkutano maalum wa wananchi wa Kata ya Kiparang’anda Wilayani Mkuranga Mkoa  wa Pwani akiwa katika ziara ya kukagua  miradi inayoendeshwa na TASAF  Wilayani Mkuranga.

 DR. amewataka wananchi Wilayani Mkuranga kutoa taarifa kwa wakati mara yanapotokea mabadiliko ndani ya kaya inayonufaika na mradi huo ambao kwa kata ya Kiparang’anda imebahatika kupata mradi wa uhawilishaji fedha.

Aidha amewataka waratibu wa mradi TASAF kutumia utaratibu mzuri na unaofaa katika kuwaondoa wanufaika wa mradi ambao wanaonekana tayari wamejikwamua  kimaisha badala ya kuwaondoa kimya kimya bila ya taarifa ambayo huleta mkanganyiko wa kuhakiki taarifa.

Amesema katika kuhakikisha miradi hii ya TASAF inasonga mbele sambamba na dhamira ya Rais DR John Pombe Magufuli ya kuwaondoa wananchi wake katika uchumi wa chini kwenda uchumi wa kati kupitia viwanda ifikapo mwaka 2025. 

Awali baada ya kupokea taarifa kutoka kwa mratibu wa TASAF Wilayani Mkuranga Safina,  DR. Gwajima amewapongeza Mkuu wa Wilaya ya Mkuranga Filberto Sanga sambamba na Mkurugenzi wa Halmashauri  Wilaya ya Mkuranga Mhandisi Mshamu Munde  kwa kuwapatia chakula cha lishe watoto wenye mahitaji maalum katika Hospital ya Wilaya Mkuranga .

Mradi wa TASAF  Wilayani  Mkuranga unatekelezwa katika vijiji 77 kati ya vijiji 125 na wanufaika wa mradi huu ni kaya 4584.