Timu ya wataalam yaundwa kutatua mgogoro kati ya wafugaji na wakulima

Posted on: August 25th, 2018

Naibu waziri wa Mifugo na Uvuvi Mh Abdallah Ulega (MB) amemuagiza katibu mkuu wa wizara ya Mifugo na uvuvi kuunda timu ya wataalam ambao watashughulikia mgogoro kati ya wakulima na wafugaji katika Mkoa wa Pwani.

Akizungumza mbele ya wananchi wa kijiji cha Kondo Mwelanzi kata ya Bupu Wilayani Mkuranga hapo jana kwa lengo la kuwapa pole na kuwatia faraja wananchi wa kijiji hicho ambacho walivamiwa na kupigwa na wafugaji jamii ya wamang’ati katika sikukuu ya Eid El Haji.

“katibu Mkuu wizara ya mifugo na uvuvi atengeneze timu ya wataalam waje mkuranga,kisarawe,,Rufiji na Kibiti kwa sababu ng’ombe wanaotusumbua leo wametokea Kisarawe hivyo upo uwezekano mkubwa wakifukuzwa Mkuranga watakimbilia Rufiji na Kibiti” Ulega alisema

Ulega aliongeza timu ya wataalam itakayoundwa itahusisha Wizara ya Mifugo,Misitu,Ardhi wakishirikiana kwa pamoja na wataalam wa Halmashauri ili wapate majibu ya kisayansi kufahamu mifugo hiyo imetoka wapi na itakwenda wapi na watafutiwe eneo gani ili wakae salama ili kuepusha kuvamia mashamba ya wakulima kila siku.

Ulega alisisitiza timu hiyo  inatakiwa ije na suluhu ya kudumu kuhusu tatizo la wafugaji na wakulima.

“Nalaani kitendo kibaya kilichofanywa na wafugaji hao cha kujichukulia sheria mkononi,vyombo vya dola wahakikishe waliofanya jambo hili wanapatikana  na sheria ichukue mkondo wake”.Ulega alisema

Aidha Ulega alisisitiza kwamba wananchi wanataka mifugo yenye tija lakini sio ufugaji wenye  kuharibu mashamba na mazao ya wananchi.

Mwenyekiti wa Halmashauri ya Wilaya ya Mkuranga Mh Juma Abeid alitoa pole kwa wananchi waliopatwa na matatizo hayo na kuwataka jeshi la polisi kuhakikisha wamang’ati hao wanapatikana ili wachukuliwe hatua za kisheria.