TUZO KWA WALIOFANYA VIZURI ZATOLEWA

Posted on: March 12th, 2021

Mkurugenzi Mtendaji wa Halmashauri ya Wilaya ya Mkuranga Mkoa wa Pwani  Mhandisi Mshamu Munde amewapongeza viongozi wa sekta ya elimu msingi wa ngazi mbali mbali kwa mchango wao mkubwa katika kuboresha elimu.

 Akizungumza katika hafla ya utoaji Tuzo kwa waliofanya vizuri Munde aliwaahidi kuwaboreshea maslahi yao na mazingira ya kufanya kazi ili kufanikisha malengo mahsusi ya Taifa kuelekea azma ya kufikia uchumi wa kati kabla ya mwaka (2025) huku akiweka bayana elimu ni mhimili mkubwa kufanikisha uwepo wa viwanda.

Akifungua  hafla hiyo kwenye ukumbi wa shule ya sekondari Ujenzi Mkuranga, Mwenyekiti wa kamati za kudumu  huduma za Jamii Hassani Dunda aliipongeza sekta ya elimu chini ya Mkurugenzi wa Halmashauri ya Wilaya Mkuranga Mhandisi Mshamu Munde kwa  kuboresha Miundo mbinu hali inayochangia  kufanya vema kwenye mtihani wa Taifa uliopita na kufaulisha wananfunzi 7359 kati ya 8455 ambayo ni sawa na asilimia 86, huku  Halmashauri ya Mkuranga ikiwa ni ya (5) Kimkoa.

Naye Afisa Elimu Msingi  Halmashauri ya Wilaya   Jessy Mpangala alitoa taarifa yake akiwapongeza Walimu pamoja na baadhi ya changamoto mbalimbali zinazowakabili bado wamefanya vizuri kwenye  ufundishaji kiongozi huyo alisema,

“Halmashauri inaupungufu wa walimu (889) kwenye shule zote za msingi sambamba na miundombinu”.

Aidha  Mpangala aliwageukia wazazi akiwataka  kujenga utamaduni wa kufuatilia maendeleo ya taaluma kwa Watoto wao na kuacha kasumba ya kuwashawishi Watoto wafeli mitihani ili kukwepa kutembea umbali mrefu kufuata shule za sekondari.

Sherehe hizo zilipambwa kwa utoaji wa Tuzo mbali mbali zilizokabidhiwa na Mkuu wa Wilaya ikiwemo utoaji wa vyeti na elfu  (20) kwa mwanafunzi bora wa kike na wa kiume wa shule zote za serikali na binafsi zilizofanya vizuri.