WABAKAJI MKURANGA WATANGAZIWA KIAMA

Posted on: June 16th, 2019

Mkuu wa Wilaya ya Mkuranga Mkoa wa Pwani  Filberto Sanga ameviagiza vyombo vya ulinzi na usalama sambamba  na watendaji  wa vijiji kuhakikisha wanatokomeza kabisa ubakaji na ulawiti dhidi ya watoto.

Akizungumza na wananchi  kwenye kilele cha siku ya mtoto wa afrika  ambayo kiwilaya ilifanyika kwenye kijiji cha Bupu mwishoni mwa wiki, Sanga alizigeukia  mahakama  na Jeshi la Polisi akizitaka kuharakisha upelelezi na kutoa hukumu mara moja kwa wote watakaokutwa na hatia ya ubakaji na ulawiti

Aidha kiongozi huyo  aliwataka wazazi na walezi  kuhamasishana na kuunda kamati itakayoratibu michango ya pesa na vyakula  kwenye vijiji vyote (125) hatimae watoto wapate milo shuleni ili kuchochea kiwango cha ufaulu sambamba na kupunguza utoro.

Sanga alitumia fursa hiyo kumpongeza mkurugenzi wa Halmashauri ya Wilaya Mhandisi  Mshamu Munde, Asasi za kiraia na wadau wa maendeleo kwa mikakati yao ya kuhakikisha mtoto ambaye ni msingi  wa Taifa endelevu anapata ulinzi ,matunzo,sambamba na kumwendeleza huku akiagiza idara ya maendeleo ya jamii  kusambaza taarifa yao kwenye vitongoji  na viiji ili iwe agenda ya kudumu kwenye vikao vyao.

Awali Mkuu wa Idara ya maendeleo ya jamii Halmashauri ya Wilaya Peter Nambunga  pamoja na kuwashukuru  waliochangia  sherehe hizo akiwemo Ahmed Salum aliomba serikali kuongeza adhabu kwa wabakaji na kutenga gereza lao wakiwa na sare zenye majina “walawiti” kutangazwa ili jamii iwafahamu.

Hafla hiyo iliambatana  na burudani mbali mbali ikiwemo  ngoma ya sindimba na bunge la watoto ambavyo viliwakuna mno wananchi.