WAZAZI MKURANGA WAWEKEZE KWENYE ELIMU YA WATOTO WA KIKE

Posted on: September 4th, 2019

WAZAZI  wa Wilaya ya Mkuranga Mkoa wa Pwani wametakiwa kuwekeza kwenye elimu hasa ya watoto wa kike ili waweze kujikwamua kimaisha katika siku za usoni

Akizungumza na wazazi  kwenye mahafari ya shule ya msingi Kisemvule iliyofanyika jana,Mwenyekiti wa Halmashauri ya Wilaya Mkuranga Juma Abeid aliwataka wazazi na walezi  waache tabia ya kutumia pesa nyingi kwenye sherehe za unyago, na ngoma za usiku badala yake watumie nguvu nyingi kuwekeza  kwenye elimu ya watoto hao ili ije kuwasaidia kupata ajira na kujiajiri kutokana na uwepo wa viwanda wilayani humo

Aidha Juma Abeid ambaye pia ni Diwani wa kata ya Magawa aliwaagiza watendaji wa Vijiji, watumie vikao vyao kuhamasisha Wazazi, Wadau na Walezi wachangie pesa na vyakula kwa ajili ya watoto Mashuleni hali itayopaisha ufaulu na kupunguza utoro

Akizungumzia changamoto ya uzio wa shule alisema atatumia vikao vya Halmashauri kutenga Bajeti ya kwenye uzio. Awali Risala ya shule hiyo ilitaja changamoto ya utoro sugu kwa wanafunzi unaoathiri maendeleo ya kitaaluma shuleni na jamii kwa ujumla huku takwimu za mwaka huu zikiwataja wanafunzi (10) kutofanya mtihani wa Taifa kumaliza elimu ya msingi.

Aidha Wahitimu hao waliwaasa wanafunzi wenzao wanaobaki waendeleze nidhamu, utulivu na

usikivu muda wote watakao kuwa shuleni ili wawe mfano mzuri katika jamii na Taifa kwa

ujumla huku wakiwapa moyo wapambane hadi wazishinde changamoto.