‘ZINGATIENI UADILIFU NA WELEDI KATIKA KUKAMILISHA UHAKIKI ’ MKURUGENZI MTENDAJI MKURANGA..

Posted on: June 16th, 2020

Mkurugenzi Mtendaji wa Halmashauri ya Wilaya ya Mkuranga Mhandisi MshamuMunde jana  amefungua mafunzo maalumu kwa wawezeshaji watakaoenda   kufanikisha zoezi la uhakiki kwa walengwa wanaofaidika na mradi wa kusaidia kaya masikini (TASAF) unaotarajiwa kuanza mapema mwishoni mwa wiki hii..

Katika hotuba yake Mhandisi Munde alisisitiza kuwa mafunzo haya yanatolewa kwa lengo la kuwapa uelewa na utaratibu wa namna gani uhakiki utafanyika ukizingatia uhakiki wa mwaka huu  unafanywa kwa njia tofauti na vitatumika visukwambi kwa ajii ya uhakiki huo.

Munde alisisitiza kuwa hili zoezi ni la muhimu kwa sababu lengo kubwa ni kuondoa kaya hewa kama zipo ili kuwa na idadi ya watu kamili ambao wanastahili kupata msaada huu

“Katika mazoezi kama haya mara nyingi tunapenda sana uadilifu  wa watendaji ambao wametumwa kufanya hiyo kazi na ndio maana kipindi hiki wakati wa kufanya mafunzo haya tunataka wawezeshaji ambao wataenda kufanya zoezi la uhakiki waape na maana ya kiapo ni kwamba wakishafanya kazi na ikagundulika kuwa ni kazi mbaya watawajibishwa kulingana na kiapo chao” alisisitiza  

Naye  Mkurugenzi wa TASAF ndugu Adslaus Mwamanga ambaye amewakilishwa na bi Mary Mtambalike alisema  tathmini ya utekelezaji wa kipindi cha kwanza cha awamu ya tatu ya TASAF inaonyesha kuwa mpango wa kunusuru kaya Maskini umechangia kwa kiasi kufikiwa azma ya serikali ya kupunguza umaskini nchini.

Sambamba na hili Mwamanga alisisitiza Takwimu zinaonyesha kwamba utekeleza wa mpango kwenye kipindi cha kwanza umechangia kupungua kwa  umaskini wa mahitaji ya msingi kwa kaya kwa asiimia 10 na umasikini uliokithiri umepungua kwa asilimia 12 kwa kaya maskini   nchini.

Zoezi hili la uhakiki linafanyika kutekeleza agizo la Mh. Rais John Pombe Joseph Magufuli wakati alipotoa agizo februari mwaka huu kwamba kabla ya shughuli zozote za kipindi cha pili kuanza, uhakiki wa walengwa ufanyike  kote nchini ili kuondoa kaya zote za walengwa ambazo zimepoteza sifa .