Jafo aagiza vyumba vya madarasa kujengwa Mkuranga

Posted on: February 7th, 2018

Waziri wa Nchi  Ofisi ya Raisi  Tawala za Mikoa  na Serikali za Mitaa(TAMISEMI), Mhe Selemani Jafo amemuagiza Mkuu wa Wilaya ya Mkuranga na Mkurugenzi Mtendaji wa Halmashauri kufanya ujenzi wa shule mpya katika eneo la kipala mpakani ambalo lipo jirani na shule ya msingi Mwandege, sambamba na kukamilisha shule mpya ya Chatembo ili kupunguza msongamano wa wanafunzi katika shule ya msingi Mwandege.

Mh Jafo alifikia uamuzi huo hapo jana  baada ya kutembelea katika shule ya msingi Mwandege ambayo ina  wanafunzi zaidi ya 3700 ambapo kati yao kuna ziaidi ya wanafunzi 560 ambao ni darasa la kwanza pekee.

Jafo alisema msongamano wa wanafunzi shuleni hapo umesababishwa na muitikio mkubwa wa elimu bila malipo ambapo wazazi wamehamasika kuwapeleka watoto wao kupata elimu.

Akizungumza mbele ya waalimu na wanafunzi wa shule hiyo  Jafo amewaahidi kupeleka fedha ndani ya wiki hii kwa ajili ya ujenzi wa vyumba vitatu vya madarasa ili kupunguza kero ya mlundikano wa wanafunzi shuleni hapo.

“Ifikapo machi 06, mwaka huu vyumba vya madarasa viwe vimekamilika ili kupunguza idadi kubwa wa wanafunzi” Jafo alisema.

Katika ziara hiyo, Jafo amewaomba wananchi wa wilaya ya Mkuranga wamuunge mkono Mbunge wa Jimbo la Mkuranga  Mhe Abdallah Ulega kwani  anahangaika na kujituma sana kwa ajili ya kuwaletea  maendelea wananchi wa Mkuranga.